Ua osofa’i e Isaraelu le vaega a le Houthis i Yemen ina ua mae’a lo latou fanaina ane o se isi ituaiga missile fou aga’i ia Isaraelu.
Fai mai le militeli a Isaraelu e pei ona lipotia e le CNN na latou osofa’ia se nofoaga o le militeli a le vaega lea i le nofoaga tonu o loo iai le maota o le Peresetene atoa ai ma nisi nofoaga se lua o power plants ma fuel storage.
A itiiti mai pe to’afā ua maliliu ai e pei ona ta’ua i le lipoti ma le isi 67 o loo manunu’a e pei ona lipotia i le televise e puleaina e le vaega lea a le Houthis.
Ta’ua e Isaraelu ua faia a latou osofa’iga e tali atu ai i osofa’iga faifaipea a le vaega faatupu faalavelave lea e faia ane ia i latou ma e silia ma le 10 vaalele tau na aofia ai i le latou osofa’iga.
O le faamatalaga a le minisita o le puipuiga a Isaraelu, Israel Katz ua ta’ua ai, mo soo se ‘au‘upega poo missile e fana ane e le vaega lea ia Isaraelu, o le a faatele atu taimi latou te totogi pe taui atu ai lea osofa’iga.
Ta’ua e Netanyahu o osofa’iga ia e faailoa atu ai le malosi ma le naunauta’i o lona atunuu ma o le a totogi lava e le Houthis se tau tele e tusa o ana aga ia e fai ane ia Isaraelu.
Fai mai ua viia e le ta’ita’i o Iran o Ayatollah Khamenei osofa’iga a le vaega faatupu faalavelave lea, fai mai a ia e totoa tele tagata o Yemen ma o le mea sa’o lea ua latou faia.
Puna o Faamatalaga: https://edition.cnn.com/2025/08/24/middleeast/israel-yemen-houthi-missile-intl
