Ua osofa’i e le militeli a Isaraelu fale maualuluga i Gaza City i le mae’a ona fautuaina tagata e aumau ai ma tuaoi foi ina ia aga’i ese.
I le lipoti aupito lata mai a le CNN i le matāupu lea ua taua ai e foliga ua vave le faagaioiga e Isaraelu o le osofa’iga lea i Gaza City ma o loo faamuamua ona tuuina e le militeli lapata’iga i tagata ina ia aga’i ese a o le’i faatinoina osofa’iga.
Ua faia ia osofa’iga a o feta’ua’ina le fonotaga e faia na valaau e le Palemia o Isaraelu, Benjamin Netanyahu e faatalanoa ai taumafaiga ina ia aua ne’i aafia fua i latou o loo ave faapagotaina i Gaza.
O le fonotaga o loo ta’ua e auai ai sui mai le va i fafo ma le puipuiga a Isaraelu aemaise sui o le militeli ma le vaega o le puipuiga.
Na aofia ai i fale tetele ua faaleagaina se tasi o fale tele e faaigoa o le Al Kawthar Tower e lata i le uafu i Gaza, fai mai sa faaaogā e le Hamas e mata’itū ane ai gaioiga a fitafita Isaraelu i lea faaitu.
E 11 fogafale o lea fale tele ma ua faaleagaina uma nei e Isaraelu.
Puna o Faamatalaga: https://edition.cnn.com/2025/09/14/middleeast/gaza-strike-israel-hostages-meeting-intl
