O loo faia nei faatalanoaga a Isaraelu ma South Sudan e faatatau i le faanonofoina o tagata Palesitina mai le Gaza Strip i lea atunuu o le Atu Aferika ma ua ta’ua i lipoti o se tasi lea o taumafaiga a Isaraelu ia faatino le aveesea mai o se vaega tele o tagata mai lea faaitu ua mātele ina faaleagaina le tele o mea ona o vesiga a Isaraelu ma le Hamas.
Fai mai le CNN o tagata e to’aono o loo silafia lelei lenei matāupu na faamaonia ane ia faamatalaga ia i latou aemaise le Associated Press.
E lē o mailoa poo le ā tonu le tulaga o iai faatalanoaga i le matāupu peita’i ua ta’ua afai ae faataunuuina o lona uiga o le a aveane tagata mai le tasi nofoaga o loo lamatia i le oge agai i se isi foi nofoaga e tali tutusa lava ma ua alia’e ai ma popolega tau i aiā tatau a tagata aafia.
Fai mai le Palemia o Isaraelu, Benjamin Netanyahu i le CNN o lona manatu o le gaioiga sa’o lea ua tatau ona faia o le faataga o tagata e aga’i ese ma tuu i le latou lava faitalia.
O loo tetee iai kulupu tau aiā tatau a Palesitina i lenei fuafuaga ma ta’ua e solia ai tulafono faavaomalo.
O se tala mai le ofisa o le va i fafo a South Sudan e pei ona ta’ua i le lipoti ua faailoa ai, o lipoti faapea o loo faia ni talanoaga i le matāupu lea e lē faavaea.
O loo faatalitali la le to’atele i se isi laasaga o le a oo iai lea matāupu.
Puna o Faamatalaga: https://edition.cnn.com/2025/08/13/middleeast/israel-in-talks-to-resettle-palestinians-from-gaza-in-south-sudan-ap-intl
