O le lima ai lenei o aso o le fetauiga i le va o Isaraelu ma Iran ma e lē o tuuitiitia osofa’iga e pei ona faailoa mai i lipoti lata mai a le CNN.
Fai mai o le isi popolega o loo feagai ma Iran e faatatau i le tele o sipai Isaraelu o loo i totonu o Iran, o loo latou faaaogāina pulou, matatioata ma talifofoga foi ia iloagatā ai i latou.
Ua to’atele ua pu’e e Iran ona o le masalomia o ni sipai Isaraelu.
Talu mai le amataga o lenei vevesi e 28 tagata na pu’eina i le laumua o Iran e masalomia o i latou o sipai a Isaraelu.
O le isi faaaliga ua fepaisia’i solo i totonu o lea atunuu ua una’ia ai tagata ia mataala i tagata o loo fai a latou talifofoga, matatioata ma o latou faafoeina ni loli atoa ma ni ato o meapu’eata e feoa’i lalata i nofoaga o iai le militeli, nofoaga o pisinisi ma nofoaga o loo aumau ai tagata.
O lenei matāupu na afua mai ina ua tuua’ia e Iran Isaraelu i le to’atele o tagata maliliu i Gaza ae tuua’ia foi e Isaraelu Iran i le iai o ni o latou naunauta’iga e fasioti ni tagata se to’atele, sa sa’ilia ai e Isaraelu le faia o ni sā tau militeli ia Iran ia taofia ai lo latou mauaina o ni auupega faaniukilia.
O isi mafua’aga ua faifaitetele ai lea vevesi e aofia ai le faatupeina pea e Iran o kulupu Isalama e pei o le Hezbollah, le Islamic Jihad a Palesitina, le Hamas, faapea ma le Houthi Rebels.
Puna o Faamatalaga: https://edition.cnn.com/world/live-news/israel-iran-attack-strikes-news-06-16-25-intl-hnk
