Na aga’i sa’o se tasi o osofa’iga a Isaraelu i le ta’ita’i o le Hamas o Mohammed Sinwar ina ua osofa’ia se falema’i i le itu i Saute o Gaza i le vaiaso nei e pei ona faamaonia mai e se tasi o sui sinia a Isaraelu.
O le osofa’iga lea na fasiotia ai tagata Palesitina e to’aono ma manunu’a ai le lata i le 40 ae lipotia e lei maua lē sa aga’i iai le osofa’iga.
Ta’ua e le CNN na aafia le lotoā o le falema’i i lea osofa’iga ma iai nisi na tanumia ai i vaega na solo ane o le falema’i ma atili faigatā ai le galuega a le aufaigaluega i le aveesea mai o gasegase mai vaega sa aafia o le falema’i.
O loo teena e le Hamas nisi faamatalaga e faatatau i le osofa’iga lea ia Sinwar.
Na ta’ua foi e Isaraelu e lua loketi na tafana ane ia i latou mai Gaza ma ua lipotia ua faailoa o le vaega o le militeli a le Islamic Jihad a Palesitina na faatinoina lea osofa’iga.
O le osofa’iga aga’i ia Sinwar ua faia i le mae’a o le aso e tasi talu ona faasa’oloto ane e le Hamas lē sa ave faapagota o Edan Alexander o se tagatānuu o Amerika.
Puna o Faamatalaga: https://edition.cnn.com/2025/05/13/middleeast/israel-targets-hamas-leader-mohammed-sinwar-hospital-strike-gaza-intl
