Ua aveesea mai e Isaraelu sui o Ausetalia i le Occupied Palestinian Territories ma tuua’ia ai Ausetalia i le faaosofia o lagona lē lelei aga’i ia Isaraelu ma o se gaioiga ua faailoa e le minisita o le va i fafo a Ausetalia, ua lē manuia tele.
Fai mai le 9News na faailoa faalaua’itele e le minisita o le va i fafo a Isaraelu, Gideon Saar le faalēaogāina o visa o sui ia o Ausetalia ma tuua’ia ai le folafolaga a le alii Palemia o Albanese na faia e faapea, o le a o latou amana’ia le setete o Palesitina ma le faai’uga ua faasā ai se tasi o faipule Isaraelu mai le ulufale atu i le atunuu.
Ua faailoa foi la e le minisita lea o le va i fafo a Isaraelu o le a o latou iloilo foi ma le toto’a nisi talosaga fou mo ni visa mai sui o le malo o Ausetalia.
Ta’ua e Saar i lea lava lipoti e lē taliaina ma o se tulaga faamāina le tele o uiga lē manuia e faia faasaga i tagata Isaraelu i totonu o Ausetalia e aofia ai ma nisi ua faamata’u i sauāga.
Peita’i fai mai Penny Wong, minisita o le va i fafo a Ausetalia, o le a faaauau pea ona faia gaioiga a Ausetalia e tineia ai faiga ia faailoga tagata faasaga ia isaraelu ma o le a faaauau foi ona galulue ma paaga e sa’ilia se filemu mo Gaza.
Puna o Faamatalaga: https://www.9news.com.au/world/israel-revokes-visas-of-australias-representatives-to-the-palestinian-territory/a0d6f33b-c671-40a1-8313-ab7accc21b8b
