Fai mai o le a toe feagai foi Iran ma ni sā poo sanctions mai Malo Aufaatasi i ni nai vaiaso o lumana’i se’i vaganā ua toe foi ane i feutana’iga o loo faia e faatatau i le lumana’i o lana polokalame niukilila ma faataga le oo atu o se asiasiga faavaomalo a Malo Aufaatasi i nofoaga ia.
Ua faailoa e le CNN o le faai’uga o le masina nei ua faatulaga ai se fonotaga i le va o Iran ma atunuu e tolu o le Iuni a Europa ma afai ae lē iai se tulaga aga’i i luma mai lea fonotaga o lona uiga o le a amata loa feutana’iga i le toe tuuina o sā sa aveesea mai se taimi umi ua tuana’i ina ua iai se maliega na faamauina ma Iran.
O le faamatalaga lea ua faia ane e atunuu e tolu mai Europa ua faaigoa o le E3, Farani, Siamani ma le UK i Malo Aufaatasi pe afai ae lē gaua’i ane Iran i le latou fetuuna’iga ua faia.
Peita’i ua lipotia i le TV a le malo Iran se faamatalaga mai le minisita o le va i fafo a le atunuu, Abbas Araghchi e faapea o le toe faia o ia sā i luga o lo latou atunuu o le a iai ni tulaga ogaoga e oo iai le matāupu.
Puna o Faamatalaga: https://edition.cnn.com/2025/08/26/middleeast/iran-sanctions-reimposition-nuclear-program-intl
