Ua faaigoa foi e le minisita o le va i fafo a Iran le Palemia o Ausetalia, Anthony Albanese e vaivai e pei foi ona faaleo i se taimi e le’i mamao atu e le Palemia o Isaraelu o Benjamin Netanyahu.
Ua māfua ona faia e le minisita lea a Iran ia faamatalaga e tali ane ai i le tuliesea e Ausetalia o le amepasa o Tehran i Canberra.
Faailoa e le 9News se faamatalaga mai le Palemia o Ausetalia, o Iran na o latou faufauina nisi o gaioiga faasaga i tagata Isaraelu i totonu o Ausetalia.
O se tasi o ia gaioiga e aofia ai le osofa’ia o le faletapua’i i Melepone, le Adass Israel Synagogue ma le Lewis Continental Kitchen i Sini i le tausaga na te’a nei.
Ua tuliese ai nei e Ausetalia le amepasa lea o Ahmad Sadeghi ma isi sui o Iran e to’atolu ma ua faaigoa foi le Revolutionary Guard a Iran o se faalapotopotoga faatupu faalavelave.
Ua teena e le sooupu a le ofisa o le va i fafo a Iran tuua’iga ia a Ausetalia ma ia faasa’o ai faamatalaga a Netanyahu sa faia faasaga ia Albanese.
O le tali a le Palemia o Ausetalia e pei ona ta’ua i le lipoti, o ia e faaaloalo i ta’ita’i o le lalolagi peita’i o le saunoaga mai le minisita o le Home Affairs a Ausetalia, Tony Burke ua ta’ua ai o le malosi e lē fuaina i le tele o ni tagata e fasiotia poo le tele o tamaiti e tuu e lē fafagaina.
