I le aso 3 o Iuni na toe maua ai i sa’iliga a leoleo pagota na sosola ese ma le falepuipui i Tanumalala o Lauititi Tualima ma Aniseko Vaelei, o le Aso Lua o le vaiaso nei na tutula’i ai i le Faamasinoga Faaitumalo ma o la ioe ai i moliaga o le sosola ese ma le falepuipui i le aso 29 o le masina na te’a nei o Me.
O le aso foi lea na o la talepe ai le loka o le faitoto’a o le potu poo le sela numera 6 ma talepe le fa’alo o lea potu.
Ua la ioeina foi lea gaioiga solitulafono.
O Aniseko sa molia i lona talepe o le loka o le sela numela 9 peita’i sa ia teena ma toe faaui ai i tua e leoleo lea moliaga.
Ua faamauina e le faamasinoga le loka ai nei i le pasimā o ia pagota talu mai le aso na toe maua ai ma faafoi atu i le falepuipui.
Sa faafofoga foi le faamasinoga i le faailoa e Lauititi e faapea e lua vaiaso talu ona loka i la’ua i le pasimā e le’i faatagaina ona tā’eele, na faato’ā matala iai le fale tā’ele o le falepuipui i le vaiaso na te’a nei.
O le aso 4 o Aokuso o le a toe oo atu i le faamasinoga Lauititi ma Aniseko mo se faai’uga i se faasalaga faaopoopo a o nofosala ai i le falepuipui i nisi o moliaga ua mae’a ona tagofia ma faamaonia e le faamasinoga.
