I le sainia ai i le amataga o le vaiaso nei o maliega o le faamatuuina atu o vaegātupe o le miliona lona 3 i ta’ita’ifono ma sui o komiti o Fono Faavae mo itumalo e 4 e aofia ai, Lepa, Falealili 1, Safata 2 ma Aleipata Itupa i Lalo, o lea ua faailoa e le Minisita o Tupe o le malo tausi, ua faia se ioega a le Kapeneta e tatala ai se teugatupe e teu iai seleni o le a lē mafai ona faamatuuina atu pe a mae’a le faai’uga o le masina lenei o Iuni e mae’a ai le tausaga faaletupe o loo faagasolo.
Ua faailoa foi e le minisita o tupe a le malo tausi le afioga Lautimuia Afoa Uelese Vaai, sa iai se atugaluga o le Suetusi Sili a le malo ina ne’i faaaogā i ni faatosina seleni o le miliona lona 3, ma tusi ai le Suetusi Sili a le malo i le Komesina o faigāpalota.
O le saunoaga a le Minisita ua ave le tali a le Komesina o faigāpalota i le Suetusi a le malo ma faailoa iai, e leai se afaina o tapenaga o le palota i le faamatuuina o vaegātupe o le miliona lona 3 lea ua fetaui ma le taimi o loo vevela tapenaga ma faatosina o le faigāpalota ia Aokuso.
Ua 44 itumalo palota ua mae’a sainia maliega o le faamatuuina o vaegātupe o le miliona lona 3.
