I le tuuina atu ai e le Komisi o Pisinisi o le atunuu, le Commerce Commission o moliaga faasaga i ni lālā o le supamaketia le PAK’nSAVE ua faamaonia mai ai nei le ioeina e lālā e lua o moliaga na faila atu i luma o le Faamasinoga Faaitumalo o Aukilani.
O moliaga e ta’ua, e ala mai i le faaaogā ai e faleoloa o le PAK’nSAVE Silverdale ma le PAK’nSAVE Mill St o gaioiga taufaasesē ma le lē sa’o, e pei ona tuuina atu tau sesē i tagata faatau ma faia ia ni pa’ū e faapea e taufaavalea.
Ma ona o ia tulaga, ua o latou solia ai Tulafono o Fefaataua’iga, le Fair Trading Act.
Ua ioeina ma talia e supamaketi nei e lua le 7 o moliaga, ma le isi 3 o moliaga e le’i tuuina mai ai ni tali.
E faamauina e $600,000 le faasalaga tupe mo le solitulafono e tasi e faasala ai se pisinisi a o se kamupani i lalo o le Tulafono o Fefaataua’iga.
Faailo e le sui o le Consumer NZ, John Duffy, e moomia i faleoloa ma pisinisi ona faamaoni le faatinoina o galuega ma lo latou pitolaau o le faailoa sa’o o tau o oloa i tagata faatau.
Ma o le lē savalia o aiaiga e tula’i mai ai le lē talitonuina o i latou ma a latou faleoloa.
Ua ia fautuaina malosi le aufaipisinisi ina ia ‘alofia le faia o gaioiga faasolitulafono, e pei o le taufaavalea ma le taufaasesē o tagata.
Puna o Faamatalaga: https://www.rnz.co.nz/news/business/565121/two-auckland-pak-nsave-supermarkets-plead-guilty-to-breaching-fair-trading-act
