Ua faailoa e le Minisita o le malo tausi o loo vaaia le faalapotopotoga o vaa a Samoa le tofa Olo Fiti Afoa Vaai le faamautū ai o le ioega a le malo o Iapani i le talosaga, mo se vaa e faapitoa i le aumaia o gasegase mai le motu tele i Salafai, mo togafitiga i le maota gasegase i Motootua.
O le fuafuaga o lea vaa e faatupe e Iapani ma e lē gata o le a faapitoa i le aumaia o gasegase mai Savaii ae o le a faatotogaina foi i meafaigaluega mana’omia mo galuega faafoma’i.
O le a faamautū lea vaa i le uafu i Salelologa ma o Tesema o le tausaga nei e taunuu ai i Samoa.
Ua faailoa foi e le minisita le faaigoa o le vaa la’upasese fou lea e taunuu mai i le masina o Setema i le MV Lady Naomi II ma e 23 miliona tālā Samoa le tau o lea vaa e lē gata e ave ai pasese e tusa ma le 500 ae mafai foi ona ave ai taavale e oo i le 50 le aofa’i.
Ua faailoa e le Ofisa Sili o le pulega o uafu ma taulaga i se lipoti a le nusipepa o le Savali le afioga Sooalo Kuresa Sooalo, e mafai ona malaga lea vaa i le va o Mulifanua ma Salelologa i le 35 i le 40 minute, ma e 18 note (knots) lona saosaoa.
