I le mae’a o le tele o tausaga o le iai pea o popolega i tuaoi o atunuu e lua, ua foliga mai ua iai se aga’i i luma o le matāupu a Saina ma Initia e ui o loo iai nisi lu’itau ma masaloga i lea mafutaga.
Lipotia e le BBC i le asō o le asiasi ane o ni sui sinia e to’alua o le malo o Initia i Saina i le masina talu ai na foliga mai o i na afua ai se suiga i le sootaga a atunuu e lua.
O le faufautua poo le national security adviser a Initia o Ajit Doval ma le minisita o Puipuiga o Rajnath Singh na aga’i ane i asiasiga o se vaega o fonotaga a le Shanghai Cooperation Organisation poo le SCO lea e aofia ai sui auai e 10 e aofia ai Saina, Lusia, Iran ma Pakistan.
Ua leva ona iai le va o Saina ma Initia i le tuaoi lea e aofia ai vaitafe, vaituloto ma laufanua tuaoi e masani ona fesaga’i ai fitafita a atunuu e lua ma tau alia’e ai feeseesea’iga aemaise lava i le tausaga 2020.
Mo Initia, o Saina lana paaga lona lua i fefaataua’iga ma e faamoemoe foi i oloa mai Saina aemaise lava i minerale mai le eleele, o se tasi foi lea o tulaga e tāua tele ai le suiga lea ua ta’ua i le mafutaga i le va o atunuu e lua.
Puna o Faamatalaga: https://www.bbc.com/news/articles/cly25ndp8kwo
