O le Aso Faraile le faai’uga o lenei vaiaso i Samoa o loo tagofia ai e le Faamasinoga o Talosaga Toe Iloilo poo le Faamasinoga Apili a le faamasinoga sili, le apili a le ta’ita’i ma le sui ta’ita’i o le vaega faaupufai e puipuia aiā tatau a tagata sa avea ma Itu Agai, ua lu’i ai le faai’uga a le Faamasinoga Maualuga ua talia ai ma faamaonia teuteuga o le faavae o le tausaga 2025 na pasia e le Palemene i le masina o Fepuari o le tausaga nei, lea na palota ai le Fofoga Fetalai ma maua ai le lua vae tolu o nofoa e 53 o le Palemene.
O le faai’uga foi o lenei vaiaso o loo iloiloina ai e lea faamasinoga le talosaga apili a le tofa Maulolo Tavita Amosa ma Ututaaloga Charlie Ulia ma isi, o loo lu’i ai le faai’uga a le Faamasinoga Maualuga na faia ai le poloa’iga e taofi mo se taimi lē tumau le galuega o le fuaina o tuaoi o eleele o le nuu o Afega.
O alii faamasino e to’atolu mai Niu Sila o loo tauaveina galuega a le Faamasinoga o Talosaga Toe Iloilo, ae lagolago iai nisi o faamasino o le tatou Faamasinoga Maualuga.
E lua vaiaso o loo faagasolo ai galuega a le Faamasinoga o Talosaga Toe Iloilo.
