O se faigamalaga mai Tokyo i Iapani aga’i i Houston i Amerika na toe faaui ane i Seattle i le faai’uga o le vaiaso ina ua taumafai se tasi o le pasese e tatala faitoto’a e lua e ulufafo ai mai le vaalele.

O le faamatalaga lea na tuuina mai le FBI ma faailoa ai o le aufaigaluega a le vaalele ma nisi o le pasese na o latou taofiofia le tagata lea ma ave atu ai loa i le falema’i mo su’esu’ega ina ua tulaueleele le vaa i Seattle.

O le vaalele o le ituaiga Boeing 787-9dreamliner ma pe ā ma le 10 itula talu ona i luga o le ‘ea le vaalele ae toe faatulaueleele loa i Seattle mo le aveesea mai o lea pasese.

E leai se isi na faamanu’alia ai ae ta’ua i lipoti a le 9News e tulaueleele atu le vaalele i Seattle ae ua faailoa ai ma le lē fiafia o le isi foi pasese a le faigamalaga lava lea ona o fetuuna’iga ua toe faia i le faigamalaga ma ia tatu’i ai le faitoto’a o le falelēta’ua i le vaalele.

Na aveesea mai foi o ia e leoleo a o le’i toe faaauau atu le faigamalaga i Houston na taunuu manuia iai.

Puna o Faamatalaga: https://www.9news.com.au/world/travel-flight-from-tokyo-diverted-to-seattle-after-passenger-tries-to-open-exit-doors/4834af3e-ea00-4048-bf04-e8cb5854f5b5