O le pasia ai e le Kapeneta o le faiga faavae fou o le a lima taitaiina ai le filifilia o tagata mo galuega faavaitaimi i Niu Sila ma Ausetalia, ua faailoa e le Minisita o le Matagaluega o Tupe ua ave iai le vaaia o le polokalame o galuega faavaitaimi, ua faagasolo le faatinoina o ia faiga faavae ma le fuafuaga e oo atu ia Iulai o le tausaga asau ua faatino atoa ona aiaiga.
O le aotelega o le faiga faavae e pei ona tali le Minisita o Tupe i le feiloaiga ma tusitala, ia tutusa le faasoaina o ia avanoa faigaluega i le atunuu, o le mafuaaga lea o le ave o le filifiliga o tagata e agavaa i ofisa o Fono Faavae a itumalo palota e 51.
O le tasi o vaega tāua sa tāpā ai se finagalo o le Minisita o Tupe le Afioga Lautimu’ia Uelese Vaai, o le fuafuaga a le Malo o Ausetalia i le tatala mai o avanoa nofomau i lea atunuu e faaaogā ai le faiga o loo faatino ai le nofomau i Niu Sila, lea ua faailoa e lea Malo e ono agavaa ai ma tagata faigaluega faavaitaimi e tolu tausaga le umi o le taimi galue.
Ua pasia faaletulafono lea fuafuaga a le Malo o Ausetalia, peitai ua faailoa e le Minisita o Tupe e ao ona fai mea faalogo lea Malo i se tuualalo a lo tatou Malo i se aiaiga e faatino ai lea fuafuaga.
Le Minisita o le Matagaluega o Tupe ua iai le vaaia o le polokalame o galuega faavaitaimi, le afioga Lautimu’ia Uelese Vaai.
