E to’avalu tagata e aofia ai se misionare mai Aialani ma se tamaitiiti 3 tausaga le matua o loo tau sa’ilia pea talu mai le osofa’iga e alii na aga’i atu ma fana, o se nofoaga mo tamaiti e leai ni mātua i Haiti.
Faailoa e le CNN na faavave ane leoleo ma faamaopoopo nisi tamaiti ma le aufaigaluega a le orphanage lea e iai foi ona ofisa i Mexico ma Farani ma e 240 tamaiti o loo tausia ai e pei ona ta’ua i le latou upega tafa’ilagi.
O i latou ua ave faamalosia e le ‘au osofa’i lea i le aso o le vaiaso nei e aofia ai ma le misionare lea o Gena Heraty sa faigaluega lava i Haiti talu mai le 1993 ma sa ia vaaia le polokalame mo tamaiti e iai aafiaga tumau faapea foi ma tagata matutua.
E lē o iai se kulupu ua faalauiloa o latou na faatupuina lea faalavelave ae o loo ta’ua i lipoti o le faaitu lea e mātele ina faatonutonu e se kegi e faaigoa o le Viv Ansanm ma sa faamauina e Amerika i le tausaga nei o se faalapotopotoga faatupu faalavelave mai atunuu i fafo.
Ua saunoa le Sui Palemia, o Aialani i le lipoti lea o se tulaga faapopoleina le tula’i mai o lea osofa’iga ma le ave faamalosia o le misionare ma isi ma ua tatau nei loa ona faasa’oloto ane.
E lē o le ulua’i taimi lea ua osofa’ia ai lea nofoaga, fai mai o le 2013 foi na osofa’ia ai ma faafefe le misionare lava lea ma isi e ono faaoo le oti ia i latou.
O loo faatino nei le su’esu’ega.
Puna o Faamatalaga: https://edition.cnn.com/2025/08/04/americas/irish-missionary-haiti-gunmen-intl-latam
