E silia ma le 80 tagata Palesitina ua fasiotia i Gaza ona o osofa’iga a Isaraelu ua faateteleina.

O i latou ua maliliu e pei ona faailoa e le CNN e aofia ai le to’atele o tagata na aga’i atu e sa’ili fesoasoani.

Faamatala e nisi i le ‘aufaasalalau sa iai le fuafuaga a sui o le Hamas e feiloa’i e faamautū se tali i le proposal poo le finagalo sa tuuina ane mo le taofia o vevesi i Gaza lea na lipotia mai ananafi ua ioe iai Isaraelu.

E to’a 15 na fasiotia i se nofoaga o se a’oga ua faaaogā e tagata ma le 25 ua faamanu’alia mai ai ma e fai si ogaoga o nisi o ata ua agiga i le upega tafa’ilagi i nofoaga na maliliu ai i latou ia faatasi ai ma tamaiti.

O le faamatalaga mai Isaraelu ua aga’i sa’o le osofa’iga i se tasi o nofoaga o loo iai le ‘aufaatupu faalavelave a le Hamas i le aai o Gaza ma a o le’i faatino le osofa’iga sa faia foi galuega e faamautinoa ai le ‘alofia o le aafia ai o le soifua o tagata lautele.

Puna o Faamatalaga: https://edition.cnn.com/2025/07/03/middleeast/scores-killed-gaza-israel-intensifies-strikes-intl