E faamavae isi, mālōlō litaea isi, ae tutuli isi ona o mafua’aga, ae lē motusia ai soloa’iga o vasega faauu o leoleo e galulue i le matāgaluega o leoleo, ae faapea foi leoleo e galulue i le falepuipui a le tatou atunuu.
O lea ua la’ei toniga ma amata galulue le vasega faauu e 95 o alii ma tama’ita’i ua mae’a a latou a’oa’oga i le a’oga o tomai faaleoleo i Tafaigata, e aofia ai le 67 o leoleo poo malu o le malo, ma le 28 o leoleo o le falepuipui poo prison guards.
O le faauu ai o lea vasega fou o malu o le malo ma leoleo falepuipui ua faaopoopo atu i le tautua a le Matāgaluega o Leoleo, Falepuipui ma le Toe Fuata’ina.
O le faamalosi’au foi lea mai le Minisita o le matāgaluega i lana saunoaga i le faauuga i le Aso Faraile ua mavae, pe galulue o ni leoleo i le faamalosia o le tulafono poo le galulue i le falepuipui, e tasi le auga autū o le auaunaga, o le puipuiga o tagata ma meatotino ma le faamalosia o le tulafono.
Na muamua faia tautoga a le 95 o le vasega faauu fou a o le’i faauu ma la’ei toniga o se faailoga o le avea o i latou ma malu o le malo ma leoleo o le falepuipui.
