E fā tausaga ma masina e lima lea ua faasalaina ai nei faafalepuipui se alii e 53 tausaga le matua, ina ua ia ioeina ona moliaga e 14 o lona faatino o ni amioga matagā i fanauiti ma faia ni meafaitino e fesiligia le talafeagai poo objectionable material.
O le alii lea o Timothy Fisher na ia faatino nei amioga faasolitulafono i fanauiti a o faafaigaluega ai o se tamā o le Kerisimasi (Santa) i nisi o Westfield malls i Aukilani.
Faailoa le faate’ia o le kamupani Ausetalia sa latou faafaigaluegaina lea alii, le Scene to Believe, ina ua alia’e ana soligatulafono nei, ma ua aliali mai ai, e le’i faia e lea kamupani se sa’ili’iliga mae’ae’a aemaise ni lipoti mai leoleo mo lenei tagata a o le’i faafaigaluega o se Santa i le Westfield a Manukau, Westfield a Newmarket ma le Westifield a St Lukes i le 2022 ma le 2023.
Ina ua faia su’esu’ega o lenei alii, na iloa ai e foliga sa ia nanāina ona moliaga sa iai muamua i lalo o le Clean Slate Act i le taimi na apalai ai e lesitala i le Teaching Council, ma na toe faia ai foi ni ana amioga matagā i teineti a’oga a o galue i se kamupani tuma’oti e faia ai a’oga afiafi a tamaiti poo after-school tutoring.
Ta’ua e le faatonu sili o le Scene to Believe, Stefan Hutton, e ave lava le latou faamuamua i le saogalemu ma le ola manuia o fanau, ma ua toe faia ai se iloiloga o le faagasologa o galuega a le kamupani.
Saunoa Hutton, a o le’i faafaigaluega uma i latou e apalai e fia avea ma Santa faapea le vaega o le ‘au pu’eata, e tatau lava ona faia uma su’esu’ega mae’ae’a i o latou talaaga, pe sa iai ni a latou soligatulafono, ma e tatau ona faalauiloa e i latou uma na mea, ma e iai lava foi i latou sa vaavaaia pe supavaisa i nei Santa i taimi e galulue ai ina ia faamautinoa le saogalemu o tamaiti.
Puna o Faamatalaga: https://www.nzherald.co.nz/nz/auckland/predator-teacher-timothy-fisher-worked-as-santa-at-3-auckland-westfield-malls-after-vetting-failure/
