A o faasolo ai iloiloga ma faatalanoaga e le malo e tusa ai ma se pili o femalagaa’iga (immigration bill), o lea ua faailoa e le malo se tasi o fuafuaga i lalo o lenei pili.
O lea fuafuaga o loo aga’i tonu lea i le faatino ai o se auala e mata’itūina ai tagata poo asylum seekers i totonu o Aotearoa.
E mata’itū e faaaogā ai auala o fesoota’iga tele vavave – electronic monitoring, e ala i se ankle monitor.
E lē gata ina faia mo ē o loo ulufale mai i Niu Sila ona o faafitauli i atunuu na ola a’e ai ae manatu e faaaogā mo ē ua i totonu i le atunuu ae ua aafia i ni tulaga ma’ale’ale, poo faafitauli tau i le tulafono ma o le a toe tipoti.
I se lipoti mai le leitio faavaomalo a Niu Sila faapea nisi o ofisa o faasalalau, na faamanino ai le finagalo o le tama’ita’i Minisita o Femalaga’iga ia Erica Standford o lenei fuafuaga, o le a avea lea ma fesoasoani tele mo galuega faatino i le vaaia poo le mata’itūina lelei o tagata o loo mautinoa e aafia i ni soligatulafono e aunoa ma le taofia.
I le taimi nei o loo iloilo e se faamasino ia vaega uma, pe talafeauga fuafuaga o le faia o se electronic monitoring poo le taofia ai o le tagata i lalo o vaavaaiga mo se taimi (electronic monitoring or detention).
Faamanino e le tama’ita’i minisita, i faamaumauga lava ia e na o le 5 tagata o asylum seekers e toe faafoi i o latou atunuu mai le 130 o tagatānuu i Niu Sila e toe tipoti i totonu o le tausaga, ma e lē o matāupu uma o le a faatino ni ankle monitors.
I le faalauiloa ai e le Matāgaluega o Femalaga’iga o lenei fuafuaga, ua faailoa e le Fatonu Sili o le faalapotopotoga Asylum Seekers Support Trust Dawit Arshak lona lē lagolagoina o lea tulaga.
Ua ta’ua ua matua’i maualalo tele lea ituaiga fuafuaga.
O se vaega ua ia manatu ua faalēaogāina ai le tamaliiaga o le tagata.
Māua i lipoti o le tasi lenei o vaega o loo iloilo nei faatasi ai ma le iloiloina o osofa’iga i maota ma laoa o aiga i le vaveao poo le dawn raids.
Puna o Faamatalaga: https://www.rnz.co.nz/news/political/565495/electronic-monitoring-of-asylum-seekers-and-new-rules-for-dawn-raids-being-considered
