E 40 miliona valu selau afe tālā le vaegatupe o loo totoe mai le miliona muamua na amata ai le poloketi o le tasi le miliona mo le atina’e o nuu ma afio’aga o itumalo palota e 51.

O le seleni lea o loo totoe ina ua mae’a ona faamatuu le 10 miliona 200 afe e tapena ai ofisa o fono faavae ma faatau ai meafaigaluega e faaaogā i galuega a sui o le komiti ma le aufaigaluega o loo faagaioia le ofisa mo le faatinoina o atina’e.

O lea tufatufaga muamua na alu ai le ta’i 200 afe mo itumalo.

O le feiloa’iga a tusitala ma le Minisita o le Matagaluega o Tina ma Tamaitai Atina’e o Afio’aga ma Agafesoota’i i le masina na te’a nei o Tesema, sa ia faailoa ai o le tala o le tupe o loo lumana’i nei e folasia ai i le Palemene ma le vaevaega o seleni o le poloketi miliona lea o le a faaopoopo ai ma vaegatupe ta’i 800 afe mo itumalo ma maua ai le 1 tesimale 8 miliona e Fono Faavae o itumalo e 51.

O lona uiga o se vaevaega o le a atoa ai ma le lima miliona e maua e le itumalo i le lima tausaga o loo faagasolo nei a le paea’iga lona 17 a le Palemene.

O le faai’uga o le masina o Me o le tausaga nei e faataatia ai le tala autū o le tupe mulimuli a le faigamalo o iai nei a o le’i faia le isi palota tele, ma o le fuafuaga tau tupe lea o le a faailoa ai ma fuafuaga faai’u o le poloketi o le miliona mo itumalo palota uma o le atunuu.

O le faai’uga o le masina nei e faamuta ai avanoa mo Fono Faavae e le’i maua a latou vaegatupe o le miliona lona lua.

O le tuai atu o a latou lipoti o le mafua’aga lea o le tuai maua o a latou vaegatupe.