Ua mae’a nei galuega sa feagai ma le kamupani na totogi e le malo o Niu Sila e na te faamamā le ogasami o loo goto ai le manuao o le Manawanui, ma aveese otaota leaga ma suāuu mai le manuao faapea suāuu sa mama i fafo.
Ua faailoa e le ofisa sinia o le fitafita o le puipuiga a le malo o Niu Sila o Commodore Andrew Brown, ua toe aveese atu le lagisi sa aumai e le kamupani e faia lea galuega ma ua faatietie atu ai nisi o otaota mai le manuao faapea ma taula o le Manawanui e faafoi i Niu Sila.
Ua taoto ai pea le Manawanui i le ogasami ua goto ai ma faatali le isi laasaga o sa’iliiliga ia i le tulaga saogalemu o amu, o figota ma isi meaola o le sami i le faamoemoe e saunia ai se lipoti e tuuina atu i le malo o Samoa ma Niu Sila.
O le masina o Oketopa o le tausaga na te’a nei na tula’i mai ai se faaletonu i le manuao ma mafua ai ona mu ma i’u ina goto ai i gataifale i Saute o le motu o Upolu.
