Ua i luma nei o le faamasinoga i Ausetalia, le Broadmeadow Children’s Court faamaumauga ma faamatalaga i le matāupu na alia’e mai i le va o ni talavou se to’alua a o iai i le atunuu i se polokalame faalea’oa’oga, o se “study abroad programme”.
O talavou o loo aafia ua ta’ua, o le tasi e 14 tausaga ma le isi e 13 tausaga le matutua ma na aumau faatasi i se aiga e tasi i Edgeworth, Newcastle, NSW a o faasolo ai polokalame e pei ona faimalaga atu ai i Ausetalia.
O se faamatalaga o lenei matāupu e faapea, na aafia le teine matua 14 tausaga, ina ua tatui se’i tulou e le teineitiiti 13 tausaga i le leva o le po o le Aso Gafua.
Na faanatinati ona avatu i le falema’i le teineitiiti 14 tausaga mo togafitiga i le John Hunter Hospital, ma ona o le ogaoga ma le tugā tele o manu’aga i le ōō o sia talavou na maliu ai lava o ia.
Na saisai ma taofia faapagotā le talavou 13 tausaga i le itu na tula’i ai lenei faalavelave.
Ma o le aso na sosoo ai sa faamauina na faatino ai loa gaioiga a leoleo ma molia ai lea talavou i le moliaga o le fasioti tagata ma le loto iai poo le murder.
I le tolaulau ai o faamatalaga ua folasia i luma o le faamasinoga, o lea ua faailoa ai e iai ni aafiaga i le soifua mālōlōina o le talavou 13 tausaga ma e fai sina tele o fualaau ma talavai e na te inuina.
Ae faailo e le faamasino Magistrate Andrew Eckhold lona faamauina o le tele o vaega o loo lilifa aga’i i tulaga o le soifua mālōlōina o le mafaufau o lē ua molia, peita’i na faamanino le tugā ma le mata’utia o le moliaga o loo molia ai o ia.
I tala’aga o le matāupu i ia talavou, e faapea na taunuu atu i laua i Ausetalia e le’i masani foi le tasi i le isi ae na faia polokalame ma faato’ā masani ai ina ua aga’i atu ma nonofo faatasi i le aiga na fai ma o la aiga poo le host family a o iai i totonu o le atunuu.
E na o le 8 aso talu ona iai i Ausetalia ma amata le polokalame faalea’oa’oga ae tula’i mai loa lenei faalavelave mata’utia, ma o lea na faapea o le aso 16 o le masina lenei o Aokuso e toe foi mai ai i Niu Sila.
O loo su’esu’e e leoleo le sootaga o talavou, ma e faamauina e le Ta’ita’i Leoleo Superintendent Tracy Chapman, e pau le tulaga o loo faafaigatā ai le faasologa o le su’esu’ega o le faigatā ona malamala i le gagana ona o se tagatānuu Saina.
O le a toe tula’i le talavou 13 tausaga i luma o le faamasinoga i le masina o Oketopa ma e faamauina o le a iai ma se tagata faaliliu upu i le gagana Mandarin e fesoasoani i le matāupu.
Puna o Faamatalaga: https://www.nzherald.co.nz/world/court-hears-details-in-fatal-stabbing-of-teen-on-australia-exchange-trip/KJUSRDPHZJGNRLMX5OHJMNU2P4/
