Ua faalauiloa mai e le NZ First le tuuina atu ai i luma o le Palemene o se pili taufaaofi (member’s bill) ma le naunauta’iga e avea ma tulafono – o le mafai lea ona sisi a’e na o le tagāvai poo le fu’a a Niu Sila i luma o uma a le malo.

E pei o le maota o le Palemene, o ofisa ma matāgaluega eseese a le malo, auaunaga tau faalavelave faafuase’i ma a’oga uma a le malo. 

Faamanino e le ta’ita’i o le NZ First, Vaovasamanaia Winston Peters, o fale ma ofisa a le malo e mo tagata Niu Sila uma, e lē tatau ona soona vaaia le tele o nisi fu’a o faalealea atu, ona e lē tutusa uma finagalo ma manatu o tagatānuu o Niu Sila i le tele o vaega. 

Ua ta’ua o lenei tulafono o le a tapu ai ona toe vaaia le tele o fu’a o loo maitauina le faaaogā e faailo ai ni finagalo i itu tau i le polokiki mai lē toe faalealea i nofoaga o ofisa ma fale uma a le malo. 

Ua faailoa e le vaega faaupufai a le NZ First o lo latou talitonuga e tasi uma tagata i totonu o Aotearoa, tasi le aunuu ma e tasi foi le tagāvai.  

Ta’ua e le NZ First, o le a faatino foi aiaiga ma ta’iala i lea vaega tāua, ina ia mulimulita’ia ae faamanino le iai foi vaega e faatino ia i latou e lē savalia pe solia lea tulafono.

Ae ua faamauina le mafai ona sisi a’e o le tagāvai o se isi atunuu poo se teritori pe a iai ni faatasiga ma fonotaga aloa’ia e faatautaia i totonu o le atunuu i lena taimi.

Puna o Faamatalaga: https://www.facebook.com/NZFirst