Ua faaopoopo mai isi faamanuiaga tau tupe mo tagata o le tatou atunuu e agavaa i le penisione mo tagata matutua, i le vaega lona lua o folafolaga faatosina o le palota a le vaega e puipuia aiā tatau a tagata.
Ua faailoa i le pepa o faamatalaga faalaua’itele mai lea pati faaupufai o le isi lea o fesoasoani i le tuuitiitia o le mativa ma le tau o le soifuaga.
Ua folafola ai le faaalu o se vaegatupe e tusa ma le $68 miliona tālā i le tausaga mo le penisione a tagata matutua ma tuu mai i lalo i le 61 tausaga e agavaa ai se tagata i lea faamanuiaga, ma ua vaevae ai le eseesega o tupe maua e fua i le matua o le soifua mo ē ua penisione.
E amata atu i le 61 i le 64 tausaga le matua o le soifua o le a maua le $200 tala i le masina.
O le 65 i le 74 tausaga le matua o le soifua o le a maua le $300 tālā i le masina.
O le 75 i le 84 tausaga le matua o le soifua o le a maua le $400 tālā i le masina.
Ma le 85 ma luga atu tausaga o le matua o le soifua o le a maua le $500 tālā i le masina.
Ua faaigoaina lea fuafuaga a le vaega e puipuia aiā tatau a tagata o PELEGA (Pension Ensuring Lasting Empowerment Golden Age), ma ua latou folafola ai o le a faatino lea tapenaga i totonu o le selau aso o se faigamalo fou a lea pati faaupufai.
O le penisone o loo maua i le taimi nei e $200 tālā i le masina.
O le vaiaso na te’a nei na faailoa ai le vaega muamua o lea tapenaga e autū lava i le fesoasoani i le tuuitiitia o le mativa ma le tau o le soifuaga e pei ona folafola ai le maua e le tagata e to’atasi o le $500 tala i le tausaga.
O loo auaua’i mai tapenaga a lea vaega faaupufai i lana ta’imua ua tapena e finau ai i le palota tele, ae o loo iai foi le talitonuga o loo faavevela mai afi o tapenaga a isi pati faaupufai ia latou foi folafolaga o le a faailoa i se taimi lata mai.
O le itu mautinoa e autū uma lava ia tapenaga i le manuia o o tatou tagata ma le tamaoaiga o Samoa.
