O le avea ai o ‘aulakapi liki a alii ma tama’ita’i e i lalo o le 18 tausaga le matutua a le kolisi o Uesile i Faleula ma siamupini o lea matutua poo le Under 18 Division, ua fetaui lelei ma le meaalofa e ala i se foa’i mai le kalapu lakapi liki lauiloa o le Brisbane Broncos i Ausetalia.
O lea ua tauaao e le kolisi ni ato e faaaogā e fanau e ave ai meaa’oga, faapea toniga lakapi liki, ma nisi o oloa mo le atina’e o taaloga i totonu o lea kolisi maualuga a le Ekalesia Metotisi.
Sa faaauala mai lea foa’i i le pule o polokalame mo tagata lautele a le kalapu lakapi liki o le Bisbane Broncos, ae o le afioga ia Toalepaialii Erony Mareko na ia faia le foa’i e avea ai ma sui o lea kalapu lakapi liki i Ausetalia.
Faaalia e le kalapu i se pepa o faamatalaga o le autū o le foa’i ia fesoasoani i fanau talavou i le atina’e o taaloga mo lo latou lumana’i manuia.
