O le maliu o se alii 37 tausaga le matua o Fogatuli ma Samata i Tai i se vevesi na aafia ai nisi o tagata mai Fagafau ma Samata i Tai i le masina o Iuni o le tausaga na te’a nei, ua faasala ai e le Faamasinoga Maualuga i sana faai’uga lē na molia i le solitulafono o le fasioti tagata pa’ivalea, i le nofosala i le falepuipui mo le umi e fitu tausaga.
O Fuatia Kamaroni Tolovae e iloa foi i le isi ona suafa o Fuatia Tamalogi Vaitogi o Fagafau ma Sapapalii sa ia ioeina moliaga o le fasioti tagata pa’ivalea, o le umia o se ‘au’upega mata’utia o se laau malosi o le ituaiga o le 22 semi automatic, ma le moliaga o le umia o se laau malosi e le’i laiseneina faaletulafono.
E pei ona silafia o le vevesi na tula’i mai i le po i le va o tupulaga o ia afio’aga i Savaii na mafua ai ona umia e lē ua nofosala i le toese le laau malosi lea o loo faailoa i le faai’uga tusitusia sa iai ni ututau se 4.
Sa faailoa e leoleo ia latou su’esu’ega ina ua taunuu Fuatia i le malae o le lotoā o le falea’oga o Fogatuli ma Samata i Tai i le po na tupu ai le vevesi, sa ia faapāpā le laau malosi ma o le pulu lona fā na aafia ai se vaega o le mata o lē ua maliu lea na aafia ai ma lona fai’ai se’i tulou, ma o le māfua’aga lea o le maliu e pei ona faailoa i le lipoti a le foma’i.
O se vevesi na tupu i le lata i le 12 i le po e pei ona faailoa i le faai’uga, sa tau’ai ai maa ma faapāpā ai ma laau malosi.
E 12 tausaga na amata ai le fua o le faasalaga a le faamasinoga ae na toese isi tausaga ma masina ona o itu lelei mo lē ua molia e pei o le ifoga ma le leleiga na faia i le va o nuu na aafia, faapea taumafa ma tupe na tuuina atu e fesoasoani ai i le lau’ava ma isi tapenaga o toe sauniga o lē na maliu.
Ua totoe ai le fitu tausaga ua tuli o le faasalaga lea mo Fuatia.
O lē na maliu o Iupeli Siliva Mose poo Fautua Tuipea o Samata i Tai.
Na maliu o ia i le falema’i faaitumalo i Foailalo i le taeao o le Aso Gafua 17 o Iuni o le tausaga na te’a nei 2024.
