O le va o le tausaga e 2014 ma le 2021 sa faatino ai e ni tagata faigaluega i auaunaga mo matāupu tau femalagaa’iga i Samoa, ni gaioiga pi’opi’o na maua ai ni visa asiasi o ni tagata mai lo tatou atunuu sa malaga i Niu Sila e galulue ai i se faiga solitulafono.
E lē o faailoaina i le lipoti a le leitio a Niu Sila poo ia tagata faigaluega i auaunaga tau femalagaa’iga i Samoa sa galulue i le ofisa o femalagaa’iga a lea malo i lo tatou atunuu, poo nisi auaunaga tuma’oti faapea o loo faagaioia i Samoa.
Peita’i o lea lipoti o loo faailoa ai, o se gaioiga pi’opi’o na māfua ona tupu ina ua iai se sootaga o ni tagata sa faatinoina se auala faaālatua na ave ai tagata mai Samoa ma galulue i Niu Sila.
O le vaiaso nei na faasala ai se tasi o tagata i Niu Sila sa lotolotoi i lea gaioiga ina ua faamaonia o auala na maua ai visa ma le faafaigaluegaina o tagata sa avatu mai Samoa sa solia ai aiaiga o galuega faatasi ai ma faamanuiaga tau totogi.
E 40 itula sa faigaluega ai se tagata sa avatu i lea faiga faaālatua ae na o le selau tālā Niu Sila le totogi na maua i le vaiaso.
Ua faaalia e se ofisa sinia o le vaega o femalagaa’iga a le malo o Niu Sila i lea lipoti o se taimi muamua lea ua maua ai se faiga solitulafono faapea i le faagaioia o ni visa mai Samoa e asiasi atu ai o tatou tagata i Niu Sila.
O se tasi sa molia foi i Niu Sila i lenei lava gaioiga o loo nofosala i le falepuipui mo le 4 tausaga ma faatonuina e toe totogi se tinoitupe e fā afe tālā Niu Sila.
Ua faaalia e le vaega o femalagaa’iga a Niu Sila i le lipoti a le leitio a Niu Sila, e le’i aafia ai ni tagata faigaluega faavaitaimi mai Samoa i lea gaioiga solitulafono.
