Ua tolu nei aso talu ona faagasolo le lesitala o sui faatutū o le faigāpalota tele o loo loma a le atunuu i le masina fou, ma ua molimauina i le mae’a o le aso lona lua e 42 sui faaolioli mo nofoa o le paea’iga fou a le Palemene ua mae’a ona lesitala.
Ua faamaonia lea tulaga i ata pu’e ua faailoa lautele ai le komesina o faigāpalota ma ia sui faatutū mai patī eseese faapea sui tauva tuto’atasi o loo faatalofa ma lūlū aao ina ua mae’a ona faia a latou lesitala.
Ua faailoa e le ta’ita’i o le vaega faaupufai o le Faatuatua i le Atua Samoa ua Tasi i sana faasalalauga i luga o le api o foliga, o le Aso Lulu le ogatotonu o lenei vaiaso e mae’a ai ona lesitala sui tauva o le latou patī faaupufai.
Ua manino ai o le vaega faaupufai muamua lea o le a mae’a lesitala o latou sui tauva, a o faagasolo ai pea lea galuega se’ia mae’a i le ta o le 12 o le aoauli o le Aso Toonai o le vaiaso nei.
Ua faailoa e le ta’ita’i o lea patī, susuga Laaulialemalietoa Polataivao Leuatea Schmidt, toe lima itumalo faapalota o loo totoe e lesitala ai ona sui tauva e to’afitu o loo totoe ona mae’a lea o a latou sui faatutū.
O isi patī faaupufai o loo faasolo atu a latou sui faaolioli e lesitala ma faamautū ai le avea ma sui tauva o le faigā filifiliga aoao a le atunuu.
