I le tapunia ai o le avanoa i le Aso Gafua o le vaiaso nei aso 9 o Iuni e lesitala ai pati poo vaega faaupufai, a o lumanai le palota tele ia Aokuso, ua faamautū nei e fitu pati ua lesitala ma o le talitonuga o pati foi ia o le a tauva o latou sui i le faigāfilifiliga aoao i le aso 27 ma le 29 o le masina o Aokuso.
O nisi o vaega faaupufai fou sa lesitala atu i le faai’uga o le vaiaso ua mavae ma le amataga o lenei vaiaso o le Samoa Labour Party o loo lotolotoi ai nisi o tamalii sa avea ma faipule o le Palemene i ni paeaiga ua mavae ma sa lagolago i le pati faaupufai e puipuia aiātatau a tagata.
O ia tamalii o le afioga Faaolesa Katopau Ainuu, o Sooalo Umi Feo Mene, ma le afioga Tuisa Tasi Patea.
O le isi o pati fou ua faaigoa o Tumua ma Pule Republican Reform Party o loo taulamua ai le tofa Molioo Pio Molioo o lona tuaa le tofa Molioo Teofilo sa avea ma sui faipule o le Palemene i ni paeaiga ua tuana’i.
O lona faletua le afioga Mulipola Anarosa Ale Molioo, o se sui faavae o le pati faaupufai o le Faatuatua i le Atua Samoa ua Tasi.
O vaega faaupufai la e fitu ua mae’a lesitala i le ofisa o le komisi o faigāpaota, o le Samoa ua potopoto le Samoa Uniting Party le S.U.P., vaega faaupufai e puipuia aiātatau a tagata le H.R.P.P., le Faatuatua i le Atua Samoa ua Tasi le F.A.S.T., Samoa National Development Party le S.N.D.P., Constitutional Democratic Republic Party le C.D.R.P, le Samoa Labour Party le SLP, ma le Tumua ma Pule Republican Reform Party le T.P.R.R.P.
E tatau i vaega faaupufai uma nei ona manumālō ni o latou sui se to’avalu poo le sili atu ina ia aloa’ia ai ose vaega faaupufai i totonu o le Palemene o Samoa.
A i lalo ifo o le to’avalu ni sui e manumālō mai i le faigāfilifiliga a Samoa, e lē aloa’ia i le Palemene ae avea sui Faipule ma sui tutū to’atasi.
Ua mae’a ona faailoa aloa’ia le vaega faaupufai o Tumua ma Pule, ae o le Aso Toonai nei e faalauiloa ai le pati faaupufai o le Samoa Labour Party i se sauniga o le a faia i le maota o le Tuutuuileloloto.
