O afio’aga o Solosolo, Salelesi, Eva, Saoluafata, Luatuanuu, Leusoalii, ma Fusi o le a aofia i le polokalame fesoasoani a le faalapotopotoga o le Toomaga mo ē Puapuagatia i se faigāpaaga ma le faaputugatupe a Malo Aufaatasi ua ta’ua o le United Nations Trust Fund.
O le autū o le fesoasoani o le faia lea o polokalame e una’ia ai atina’e mo le manuia o tagata o ia afio’aga.
O le tasi o vaega tāua o le polokalame fesoasoani o le faamalosia o le itupa o tinā ma tama’ita’i i le faatinoina o taumafaiga eseese mo le manuia o aiga ma nuu.
O le faamautūina o lea faamoemoe na sainia ai i le Aso Tofi o le vaiaso nei e le ta’ita’ifono o le Fono Faavae a le itumalo o Anoamaa 2 lea o loo aofia ai ia afio’aga i le maliega ua ta’ua o le memorandum of understanding poo le M.O.U. e avea ma laasaga e fausia ai le faigāpaaga a lea Fono Faavae ma le polokalame.
O le Aso Faraile lenei o le a sainia ai foi lea maliega e le Fono Faavae o loo faasino iai nuu ma afio’aga o le itumalo o Falealili 1.
