Ua teena e le Sui Palemia o Fiti ma o le Minisita foi o tupe a lea atunuu o Biman Prasad, faamatalaga e faapea o loo galulue faatasi faalilolilo i ni auala faasolitulafono ma le Sui Faaao o le Iunivesite o le Pasefika, Pal Ahluwalia.
Fai mai le RNZ o loo iai nei Prasad ma le Minisita o Aoga a Fiti o Aseri Radrodro i Aukilani mo le fonotaga lona 99 a le Pulega o le Iunivesite ae o loo tuua’ia i tuua’iga ia o aiā feteena’i.
Taua i le lipoti lava lea a le RNZ se faamatalaga o loo lomia i se tusi i le faatonu i le Samoa Observer ua ta’ua ai o loo silafia e le USP Council se matāupu tau ta’ita’iga poo le leadership o loo aofia ai le iunivesite ma ta’ua ai foi le iai o se sootaga vavalalata a Ahluwalia ma le Sui Palemia o Fiti.
Na faailoa e le Sui Palemia i le lipoti lea e to’atele tagata e feiloa’i atu iai i le iunivesite ma o le to’atele o ana uo e aofia ai ma le Palemia o Samoa.
Na ta’ua e Prasad o ia e lē malamalama i ia tuua’iga e pei ona lipotia.
O le iunivesite o le Pasefika e umia e atunuu e 12 o le Pasefika ma ua faailoa e le leitio faavaomalo sa feagai ma faafitauli tau le ta’ita’iga ma le aufaigaluega faapea iuni i totonu o Fiti i le tausaga na te’a nei na faamālolo ai se ta’ita’i o le iuni a tagata faigaluega.
Puna o Faamatalaga: https://www.rnz.co.nz/international/pacific-news/561658/fijian-deputy-pm-rejects-university-of-the-south-pacific-collusion-claims-says-no-leadership-crisis
