Ua saunoa le Palemia o Fiti e faapea ua faia le iloiloga a le Peresetene o le atunuu i lana faai’uga na faia e faamālōlō lē tumau ai le Komesina o le FICAC, le Fiji Independent Commission Against Corruption ma ua toe faaui i tua lana faai’uga sa faia.
Ua lipotia foi o loo ua iai se isi gaioiga ua faia foi e Peresetene Ratu Naiqama Lalabalavu ua toe aveesea ai le tofia o Barbara Malimali e avea ma Komesina.
O le faamatalaga lea a Sitiveni Rabuka na faia i luga o le facebook ma lipotia e le RNZ.
Sa faailoa e le Law Society a Fiti le latou faai’uga e uiga i le matāupu lea i le aso ananafi e faapea e solitulafono ma e leai foi se matāfaioi a le Palemia i le matāupu lea.
Ua valaau le ta’ita’i o le Itu Agai a le atunuu Inia Seruiratu e tatau i le faigamalo ona faailoa faalaua’itele le lipoti a le komisi su’esu’e i le matāupu lea ma lona faai’uga ia silafia uma e tagata o le atunuu.
Puna o Faamatalaga: https://www.rnz.co.nz/international/pacific-news/562898/fiji-ficac-saga-suspension-rescinded-appointments-revoked
