O le Aso Toonai le faai’uga o lena vaiaso ua alu sa amatalia ai le taamilosaga lakapi ta’ito’afitu o le Inaugural Pacific Rugby i le Gold Coast i Ausetalia, e faapitoa i alii talavou e logonoa lea o loo tausinio ai le ‘aulakapi fitu a tama Samoa.
O le ‘au lea sa auai i le taamilosaga lakapi ta’ito’afitu o le selau tausaga o le lakapi a le afio’aga o Moataa talu ai nei, e avea o se isi a latou tapenaga mo le taamilosaga i Ausetalia.
Ua faailoa i le taunuuga o a latou taaloga i le aso muamua le Aso Toonai na te’a nei na malolo uma i taaloga e tolu.
E 38 ‘ai o le ‘aulakapi fitu a Fiti ae le’i tau’ai le tatou ‘au; o le taaloga ma Iapani e 12 i le 10 ‘ai ma le taaloga ma Ausetalia e 10 o latou ‘ai ae 22 Ausetalia.
O le Aso Sa sa faia ai isi a latou taaloga peita’i e tuuina atu lenei lipoti e le’i maua mai le faai’uga o ia taaloga.
O le auai atu o le ‘aulakapi ta’ito’afitu a tama talavou Samoa e logonoa i le taamilosaga o se tasi o taumafaiga e una’ia le atina’e o le lakapi mo alo ma fanau a le atunuu e iai aafiaga tumau.
