O le finau a loia a leoleo mo se faasalaga e 3 tausaga i le falepuipui o se alii na ioe i le moliaga o le fasioti tagata pa’ivalea, ua manatu le faamasinoga e eseese mea e tutupu i ni moliaga matuiā faapea e tuua’ia ai se tagata ma ua lē faasalaina ai i le falepuipui Seumanu Silivelio Lui o Moamoa, Sataua ma Fusi Safata, ae ua nofo vaavaaia mo le 18 masina ma galue fua mo le lelei o tagata lautele i le selau itula.
O lē na molia o se tamā ua 37 tausaga o lona matua e faaipoipo ma fai le fanau, ma o lona to’alua e faagaioia le fale’aiga o le Sunrise i Apia.
O Iuni o le tausaga nei i le nofoaga o iai lea pisinisi na faatino ai le solitulafono e pei ona faailoa i le faai’uga tusitusia.
O se taulealea e faasuā’avā sa aga’i i le to’alua o lē ua molia ma fai iai pe mana’o na te faatauina ana apaapa malie poo shark fins, ae sa lē mana’o iai le tinā.
Sa faapisapisaō ai le taulealea i le nofoaga o iai e fale’aiga ma vili ai loa leoleo, peita’i na muamua taunuu iai lē ua molia ma taumafai e faafilemu.
Sa lē mafai lava ma faapena ona tu’i ai e lē ua molia le taulealea ma palasi ai i lalo, tau lona ulu i le fola simā.
Na taumafai lē ua molia ma lona to’alua e fesoasoani ina ua vaaia ua matapogia le taulealea.
O le gaioiga lea na te’i ane ai lē na aafia ma ave loa e le ulugalii i le falema’i.
Peita’i o ni itula mulimuli ane ai na maliu ai o ia, ma o le lipoti a le falema’i o loo ta’ua ai o le ogaoga o le manu’a i le ulu le mafua’aga o le maliu.
O le ifoga a lē ua molia ma le tusi talosaga i le faamasinoga a le tuafafine ma le tinā o lē ua maliu sa faailoa ai ua latou faamagalo ma ua talia le ifoga o nisi ia o vaega tāua na silasila iai le faamasinoga i le faia o lana faai’uga i se faasalaga.
O le vave tali atu foi o lē ua molia ma lona to’alua i le faia o le galuega na toe te’i ai lē na aafia, o se isi lea vaega tāua i le iloiloina o le faai’uga a le faamasinoga.
O lē ua maliu o Kerupi Isaia Mua’au 47 tausaga o le soifua, o se tamā ua faiaiga e to’afā le fanau mai afio’aga o Tafatafa Falealili ma Tufuiopa.
O lē na molia o se tasi sa avea ma leoleo o le malo.
