Ua i luma nei o le faamasinoga o faigāpalota mau a le sui tauva o le vaega faaupufai o le Samoa ua Potopoto le afioga Tuala Toiaivao Tevaga Iosefo Ponifasio, ua ia finauina ai se poloa’iga e faalēaogā ai le avea o le tofa Vaaaoao Salumalo Alofipo ma sui faatū mo le faigā filifiliga a le itumalo palota o Gagaemauga 1, ona o matai e to’alua sa faamaonia le faauluina o Vaaaoao e avea ma sui tauva, e lē atoa le 3 tausaga o a la monotaga i foaiala o le itumalo o loo matai ai.

O le isi mafua’aga e ese foaiala o loo fainuu ai, ese foaiala o loo fainuu ai lē o loo molia.

Faaalia e Tuala i lana faamatalaga tauto e lagolago ai lana finauga, o le tasi o matai na faamaonia  le faauluina o lea sui tauva e faaaiga lua ma e nofo i Niu Sila i nisi taimi ae malaga mai foi i nisi taimi ma faamautū i Samoa.

O lona talitonuga e lē atoa foi aso e tatau ai ona nofo i Samoa ma fai lana monotaga.

Ua tuuina atu e le itu tagi ni faamaumauga mai le ofisa o femalagaa’iga a le malo e faamaonia ai lana finauga.

O le Aso Gafua na amata su’esu’e ai lenei matāupu o se lu’i i le agavaa o matai na faamaonia le monotaga ma le faauluina o Vaaaoao Salumalo Alofipo o se tasi o sui tauva mo le patī faaupufai o le Faatuatua i le Atua Samoa ua Tasi.

Ua faailoa e le loia o loo tula’i mo Vaaaoao o le a iai molimau e tutula’i e teena le mau ua folasia a le itu tagi.