Ua atoa nei le vaiaso talu ona sainia e le afioga i le Ao o le Malo, afioga Tuimalealiifano Vaaleto’a Sualauvi II le pepa faamaonia o le filifilia o se tasi o Faamasino o le Faamasinoga Faaitumalo e avea ma Faamasino mo se vaitaimi o le Faamasinoga Maualuga a le atunuu.
O le afioga i le Faamasino, afioga Loau Leafa Donald Aukusitino Kerslake na filifilia e le Komisi o galuega a le faamasinoga ma fautuaina ai le faamaoniga a le afioga i le Ao o le Malo.
O Ianuari o le tausaga e 2020 na filifilia ai Loau e avea ma faamasino ae 17 tausaga o galue o se loia.
E lē gata ina galue i le Faamasinoga Faaitumalo ae o se Faamasino foi o le Faamasinoga mo Tupulaga Talavou le Youth Court.
Ua faailoa i se pepa o faamatalaga le agaga fiafia ma le faafetai o le afioga i le Faamasino Sili, afioga Satiu Simativa Perese i le taliaina e le afioga Loau o le valaau e galue o se tasi o Faamasino o le Faamasinoga Maualuga mo se taimi lē tumau, ma o le Aso Faraile o le vaiaso nei, 25 o Iulai e faatauto ai o ia i luma o lana afioga i le Ao o le Malo.
