O se tasi o alii talavou o se tama fanau a Samoa e iai ona sootaga tau toto i Tonga ma Fiti ua filifilia ana fatuga faaonaponei i le tauvaga a le leito faavaomalo o le ABC a Ausetalia, e autū i le sa’ilia o se tagata e talenia i le pese ma lotolotoi foi i le atina’eina o le musika i le Pasefika.
O lea tauvaga ua faaigoaina o le Pacific Break 2025 ua filifilia iai le Justescape95 o se igoa o loo faalauiloa ai i upega tafa’ilagi ma fesoota’iga faaonaponei fatuga a le alii talavou o Lars Gustaf Bell o lona tuaa tinā o se tama’ita’i Tonga ae o lona tuaa tamā o le Samoa le susuga Lui Bell.
E to’asefulu tagata talenia i le musika ma le fatuina o pese mai le Pasefika ua filifilia mo le sa’iliga siamupini o lea tauvaga e pei ona aofia ai ma lea alo o Samoa, ae o loo pepese ai foi ma nisi alo talavou o le atunuu i ana fatuga.
O isi atunuu ua lautogia mo le sa’iliga o le siamupini o le Pacific Break 2025 o Solomona, Papua Niu Kini, Fiti, ma Vanuatu.
E to’alima tagata pepese mai Papua Niu Kini, to’alua Solomona, ae ta’itasi sui tauva mai Fiti, Vanuatu ma Samoa.
Sa iai foi nisi tama fanau talenia a Samoa i le musika sa auai i le tauvaga lenei i ni tausaga e le’i mamao atu.
