Ua faailoa lautele ai nei e le ofisa tutotonu o malo o le Pasefika i Fiti ma le ofisa o galuega tetele a le Pasefika le Pacific Region Infrastructure Facility, le filifilia ai o se tasi o tama’ita’i o Samoa o se tina sa faauluulu iai le Pulega o Feoa’iga i le Laueleele mo ni tausaga, e galue o se faufautua mo le ofisa o galuega tetele a le Pasefika.
O le afioga Galumalemana Taatialeoititi Agnes Tutuvanu Schwalger e pei ona faailoa ai i se faasalalauga mai ia ofisa o malo o le Pasefika o le a faamautū i Suva i Fiti ma galue ai.
E pei ona silafia o lea alo tama’ita’i o le atunuu sa amata galue i le pulega o feoa’iga i le laueleele le Samoa Land Transport Authority i le tausaga e 2012 ma ia tauaveina ai nisi o tofiga i le pulega se’ia oo ina filifilia e avea ma Ofisa Sili o lea auaunaga a le tatou malo i le tausaga e 2018.
O nisi o galuega tetele i le fausia o o tatou auala tetele sa faaaogā iai ona tomai a’oa’oina tau inisinia e tusa o ona faailoga maualuluga sa maua i Iunivesite i atunuu i fafo.
Na faamavae ma le tulaga Ofisa Sili o le pulega o fela’ua’iga i le laueleele i le tausaga e 2023 ma avea ai ma konesale o se auaunaga sa ia faatino se’ia oo nei ina filifilia e avea ma faufautua o galuega tetele i le ofisa o malo o le Pasefika.
