A o faagasolo ai le fonotaga faaminisita mo atunuu e 15 o le Pasefika i lenei vaiaso lea o loo autū i le talanoaina o matāupu mo le atina’e o le ola a’oa’oina, puipuiga ma le soifua manuia o fanauiti le Pacific Early Childhood Development Summit, ua filifilia e le faalapotopotoga a Malo Aufaatasi o loo gafa ma polokalame mo le atina’e o fanauiti i le lalolagi le UNICEF, le tamaitai sa avea ma Tausala o Samoa ma le Pasefika o Moemoana Safaatoa Schwenke e avea ma o latou Amepasa i le Pasefika.
O se tofiga e tauave ai e Moemoana le faalauiloa o polokalame a le UNICEF mo le siitia ma le una’ia o le atina’e o fanauiti i atunuu ta’itasi.
O le ta’ita’i o le Malo i le tamaitai Palemia afioga Fiame Naomi Mata’afa sa ia tatala aloaia lea faatasiga tele o le taimi muamua ua talimalo ai Samoa i lea fonotaga sa masani o le atunuu lava o Fiti e tauaofia ai.
