Ua lē toe vaaia ma faalogoina le pisapisao o luga o upega tafa’ilagi ma auala o fesoota’iga i televise ma leitio i faalauiloa o faatosina a patī faaupufai ma sui tauva, ina ua faamuta i le ta tonu o le 12 o le aoauli o le Aso Sa ananafi i Samoa le ono vaiaso sa faatino ai faalauiloa o anavatau, ma avanoa ai ma le faaleoina o manatu ma lagona o le atunuu.
O le faamuta ai o faalauiloa o faatosina ua aveesea ai ma laupapa faailoilo a sui tauva ma patī faaupufai, faapea pepa faalauiloa a sui tauva poo posters sa faapipii i taavale ma nofoaga eseese e pei o luma o faleoloa ma nisi o pisinisi.
O le vaiaso lenei ua faamoemoe e faia ai le faigā filifiliga aoao a le atunuu i lana faigāpalota tele, lea ua faatulaga o le Aso Lulu le palota muamua le pre-polling ae Aso Faraile le faigāpalota aoao.
E tolu aso faigaluega o lenei vaiaso i Samoa ua na o le Aso Gafua i le Aso Lulu ae aso mālōlō tagata uma i le Aso Tofi ma le Aso Faraile mo le palota.
