O le polokalame o le guardians e autū i le su’esu’e ma sa’ili’ili i le si’osi’omaga o le gataifale ma o loo faaaogā ai ma le vaa folau o le Gaualofa, sa afea a’oga i le itumalo o Anoamaa i le vaiaso na te’a nei.
E 138 fanau a’oga sa maua le avanoa e ulufale ai i le Gaualofa ma faatino ai a’oa’oga sa faatino e sui o le faalapotopotoga o le Faasao Faavaomalo le Conservation International.
O ia a’oa’oga sa faailoa ai i fanau le tāua o le gataifale i le sami ma meaola o nonofo ai.
I se pepa o faamatalaga faalauiloa mai lea faalapotopotoga faavaomalo o loo faailoa ai e le Faatonu o le Conservation International le susuga Leausalilo Leilani Duffy Iosefa, e tāua le faa’au’upegaina o fanau o le isi augātupulaga fou i le malamalama lea i le tāua o le faasao o le si’osi’omaga e pei o le si’osi’omaga o le gataifale auā o latou e faalagolago iai le manuia o le si’osi’omaga mo le lumana’i auā isi augātupulaga e le’i feola ma soifua mai.
O lea tāua e mafai ai foi ona latou iloa ma silafia puipuiga e sili ona tāua e faafetaui ai suiga tetele o le tau.
O le polokalame o le Guardians o le a faagasolo i itumalo uma o le atunuu.
