Ua ave le fautuaga malosi a le ta’ita’i o le vaega faaupufai e puipuia aiā tatau a tagata le susuga Tuilaepa L Sailele Malielegaoi i le Komesina o faigāpalota ina ia silasila ua tatau ona faaitiitia itula faigaluega o i latou o loo galulue i le tau faamaopoopoina o le taunuuga o le faigāpalota tele a o faagasolo le faitauga aloa’ia.
O tagata e lē o ni masini e pei ona faailoa e Tuilaepa i se pepa o faamatalaga mai le ofisa tutotonu o lana pati faaupufai.
O nisi o tagata faigaluega ua molimauina e nisi, ua matuā lagona le vaivai.
O le Aso Faraile na mae’a ai le palota na ta’ape le to’atele o le aufaigaluega ua lata i le 4 i le vaveao, ae na toe usu atu i le Aso Toonai mo le faavasegaina o palota faapitoa o se galuega na malama le taeao o le Aso Sa o loo faatino pea e pei ona molimau mai nisi na mae’a ona faavasega palota faapitoa ua lata i le 10 i le taeao ae na amata lea galuega i le te’a o le 10 o le taeao o le Aso Toonai.
O le Aso Gafua na amata ai le faitauga aloa’ia ma alu ai ma le po atoa a malama le Aso Lua.
O loo iai leoleo ma le vaega e gafa ma le puipuiga poo security o loo galulue i le vaaia o le nofoaga o loo faagasolo ai le faitauga aloa’ia lea o loo teu ai foi ma pusa palota.
Ua fuafua poo le Aso Tofi ua tatau ona faaitiitia galuega i le faitauga aloa’ia o palota a o lumana’i le Aso Faraile o loo faatulaga e tatau ona mae’a lelei ai.
