O Niu Sila le malo ua faailoa le aumai o lana lagolago i galuega a le matāgaluega o le soifua mālōlōina i Samoa mo le togafitia o le pepesi o le fiva o ponaivi.
Ua faailoa e le Minisita o le va i fafo o Niu Sila le afioga Vaovasamanaia Winston Peters le auina mai i lo tatou atunuu o se vaega o foma’i mai Niu Sila poo se medical team e lagolago atu i le galuega o loo feagai nei ma le auaunaga a le soifua mālōlōina i Samoa.
E 300 afe tala se vaegatupe o le a fesoasoani ai foi Niu Sila i le faatauina o vailaau ma isi vaega mana’omia mo togafitiga o lea gasegase ma o le a iai foi ma fesoota’iga a ofisa sinia o le soifua mālōlōina a Niu Sila ma ofisa sinia o lea auaunaga i Samoa ina ia maua ai fesoota’iga i taimi uma mo nisi fesoasoani e ono mana’omia.
Ua faailoa lea fesoasoani a Niu Sila ma le fautuaga i ona tagata e malaga asiasi i Samoa ina ia mataala ma mata’alia i le tapenapena i puipuiga mai le dengue fever a o iai i lo tatou atunuu mo ni tafaoga poo nisi mafua’aga e malaga mai ai i lo tatou atunuu.
