A o tālia ai se isi lipoti lata mai a le soifua mālōlōina i le tulaga ua iai le pepesi o le faama’i o le fiva o ponaivi, ina ua toe a’e uma ai a’oga i le tuana’i o ni vaiaso o mālōlō fanau e māfua i puipuiga o lea faama’i, ua faailoa ai nei e le malo o Ausetalia lana fesoasoani mo Samoa ma nisi o atunuu o le Pasefika mo le togafitia ma le puipuiga mai le dengue fever poo le fiva o ponaivi.

E tusa ma le tasi le miliona tālā Ausetalia lea fesoasoani o le a lē gata e aumai ai vailaau ma isi oloa mo togafitiga, ae o le a aumai ai foi foma’i ma tausi soifua o lea malo e fesoasoani i le matāgaluega o le soifua mālōlōina i lo tatou atunuu.

O le a galulue faatasi ai ma foma’i ma tausi soifua mai Niu Sila ua malaga mai foi ona o le fia fesoasoani o lea malo o se tasi o paaga totino a Samoa.

O le lipoti mulimuli i le pepesi o le fiva o ponaivi ua faailoa ai le faaitiitia i le 14 pasene o le numela o tagata e fulisia lava i fanau i Samoa ua aafia i āuga o le fiva o ponaivi.