E lē tau faailo le telē o le sootaga a o fesoota’iga a le Ofisa o Tiute aga’i i le Vaega o fitafita i luga o le vasa poo le Royal New Zealand Navy a le atunuu pe a tula’i mai masalosaloga i ni vaa e afea uafu faavaomalo o le atunuu.
E pei ona faailoa i lipoti mai e le NZDF taumafaiga a le vaega o fitafita i luga o le vasa ma i latou e puipuia itu tuaoi, nisi o a latou galuega su’esu’e na faatautaia ni vaa, e masalomia o loo aumai ai i luga ni fualaau faasāina.
Ua faamauina i su’esu’ega e faalua ona aga’i inisinia o le HMNZS Matataua ma le ‘aumāulu poo divers e su’esu’e vaa o loo masalomia e sa’ili’ili lelei itu uma o le vaa aemaise le pito i lalo o le vaa.
Ma i taualumaga o nei su’esu’ega na maua ma taofia ai e le vaega o tiute ma fitafita o le vasa pauta faasāina o le cocaine poo le ‘aisa i luga o vaa na su’esu’eina.
Ta’ua i pepa o faamatalaga, o le aso 4 o le masina o Me na maua ai e le vaega o Tiute, le NZ Customs le 157 kilokalama o ‘aisa e oo atu i le $60.9 miliona tālā Niu Sila lona tau aofa’i na maua i totonu o ni pusa la’u oloa tetele poo containers i luga o le vaa ua ta’ua o le Panama.
Ma i le aso 26 o Me na faamaonia mai e oo atu i le 130 ni poloka poo ni afifi o pauta faasāina o le ‘aisa na maua i totonu o pusa la’u oloa tetele o shipping containers na taunuu atu mai Italia e tauala atu i le vaa o le Panama.
Ua faaalia le faaauau pea o iloiloga i containers o loo aumai i totonu i luga o vaa, o le naunauta’iga ia faamausalīina taumafaiga ia taofia le oo mai o nei fualaau faasāina i totonu o le atunuu.
Puna o Faamatalaga: https://www.nzdf.mil.nz/media-centre/news/navy-teams-back-customs-in-drug-busts/
