E faate’ia le to’atele ina ua sau i tua o se lipoti a le ofisa faasalalau a le Stuff, e faatatau i se tasi o alii ua iloga i lenei vaitau i lana tautua, le alii o Fale Andrew Lesā.
O se lipoti o loo faamauina ai se su’esu’ega auiliili a le Stuff e tusa ai ma lona agava’a e tauaveina nisi o tofiga aemaise o le avea ai o ia ma faauluuluga o falepuipui – e pei ona faaigoaina o le “Visiting Justice”.
Ua fesiligia le moni ma le faamaoni o faamaumauga ma faamatalaga na tusia e Fale Andrew Lesā e tusa ai ma lona agavaa poo le CV – e pei ona iloa ma silafia uma e le to’atele, i taimi e faatino ni tusi talosaga mo se galuega o loo talosaga iai.
E fai sina tele ma maualuluga faailoga aemaise o tulaga tofi o loo faamauina i le CV a Andrew.
I lana CV na ia faailoa ai o ia o se tasi o Sui Tofia o Malo Aufaatasi poo se (UN Diplomat), o se Faatonu o Faalapotopotoga o Taui mo Faalavelave Faafuasei (Director at ACC).
Na ia faauu mai i se tikerī faaloia poo le Juris Doctor (JD) degree mai se tasi o Iunivesite i Amerika o Yale, faapea ai ma le tele o nisi o matāti’a na ausia e Lesā mai i nisi o faalapotopotoga tuma’oti ma le Iunivesite o Aukilani.
E ui i se logomālie ma le matā’ina o ia faamaumauga, ae o taumafaiga a lenei alii e tusa ai ma sailiiliga na maua ai e iai ni vala e lē o fetaui ma sa’o ai faamatalaga a Lesā.
O le tasi o ia vaega, o lona faasa’oina lea o se faamatalaga na ia faia i se tasi o faatasiga i Iunivesitē o Texas, e uiga i lona mauaina ai o lona tikeri faaloia mai le Iunivesite o Yale, o le faasa’oga e leai sona faailoga faapea o iai.
Sa faamanino e Andrew Lesā, sa iai ni polokalame faalea’oa’oga i luga o le intaneti o online courses mai le Iunivesite o Yale na ia su’esu’e iai.
Na ioe uma Lesā i nisi o ona agavaa peitai e le’i ogatusa ma finagalo o nisi o sui o faalapotopotoga faapei o le Philanthropy NZ e pei ona ta’ua e Andrew o ia o se sui faufautua sinia o lea faalapotopotoga ae tali le Pule Faatonu o le Philanthropy NZ e le’i avea faatasi lea alii ma se sui faufautua sinia o le faalapotopotoga.
Māua i lipoti, o loo silafia e le Minisita Lagolago a le Matāgaluega o Faamasinoga le oo atu ai o lea matāupu ma le fesiliiga ai o le agavaa ma le alagatatau o le umia e Andrew Lesā o le tofiga o le Visiting Justice, ma ua ia talosagaina ai se iloiloga mai le Matāgaluega o Faamasinoga.
Ae i se tala lata mai, ua māua ai le faamavae o le alii mai tofiga uma, talu ai vala ua folasia i ana faamaumauga i lana CV.
Na taumafai atu le Radio Samoa mo se avanoa ma le alii o Andrew, e faatalanoa ai o ia e uiga i lenei matāupu i le aso ananafi e tauala atu i se imeli peitai e oo mai i le taimi na tuufaatasia ai tala fou i le asō e le’i māua mai lava se tali ia Lesā.
O Andrew o se tasi o sui o le laulauāfono o Manurewa na filifili i le na o le 19 ai o ona tausaga, ae ma i le na o le 31 o ona tausaga na filifilia ai o ia e avea ma Justice of Peace.
Puna o Faamatalaga: https://www.stuff.co.nz/nz-news/360764249/justice-appointee-resigns-everything-after-stuff-investigation-reveals-flawed-cv
