O le Faamasinoga Maualuga ua silasila nei le Palemia ma lana faigamalo tausi lē tumau poo le caretaker government, o le a ave iai se tapenaga e maua ai se laolao i le mafai ma le lē mafai i totonu o le 3 masina, ona faatino loa se palota tele a le atunuu.
O le saunoaga faaminisita a le tamaitai Palemia ina ua toe usu le fono aoao faitulafono i le Aso Lua o lenei vaiaso, sa ia faailoa ai mafua’aga o le lē ono taunuu o sea palota ona o mafua’aga e pei ona ia faailoa e aofia ai le lesitala o tagata palota o itumalo o loo faagasolo lea faato’ā ausia i se tulaga aoao le 50 pasene, ae o nisi itumalo palota e aofia ai itumalo tetele o le Vaimauga ma Faleata o lea faato’ā ausia le 30 pasene o tagata o ia itumalo ua mae’a ona lesitala.
O le tasi mafua’aga o le aiaiga o le faavae e ao ona faia le palota tele i totonu o le 3 masina pe a pa’u le faigāmalo i le lē faatuatuaina ma le teena o lana tala autū o le tupe, ona e iai le isi aiaiga o le tulafono o faigāpalota o le tausaga 2019 o loo aiaia ai le tatau ona lesitala sui faatutū i le 6 masina i luma mai o le aso e faia ai se faigāpalota.
O le tasi o tulaga na faailoa e le Palemia o le faigāmalo tausi, o le pa’ū o le tala o le tupe pe faapefea ona faagasolo galuega.
E mafua lea ona e na o le 25 pasene o le tupe e fua i le aofa’iga o le tala o le tupe o loo faagasolo nei, e mafai ona faatupe ai galuega faaauau a le malo.
Faaalia e le Palemia i lana saunoaga faaminisita o le to’a lea ua iai i le mafai ma le lē mafai ona tapena se faigāpalota i totonu o le 3 masina ma mana’omia ai se isi taimi faaopoopo, e ono lē lava le 25 pasene o le tala o le tupe e faaauau ai galuega ma auaunaga a le Malo, e tālia ai se isi faigāmalo fou pe a mae’a le palota tele.
