E tasi se tagi ua i luma nei o le faamasinoga faaitumalo, ua fesiligia ai le tulaga agavaa o nisi o tagata palota o le itumalo faapalota o Falealupo.
Ua faailoa e le Komesina o faigāpalota lea tagi ina ua feiloa’i ma le vasega o tusitala i lenei vaiaso mo le faailoaina o nisi o tapenaga ua oo iai le galuega a lona ofisa mo le faigāpalota tele i le masina fou atoa ai foi ma le tali i matāupu e fesiligia ai le auaunaga a lona ofisa.
Faaalia e le Komesina ina ua fesiligia, e lē mafai ona ia faailoa lautele auiliiliga o le tagi faasaga i tagata palota o lea itumalo o loo fesiligia lo latou agavaa, ae o le Aso Lulu a sau e valaau ai lea matāupu i le faamasinoga e iloa ai faamatalaga uma.
Mo le silafia o le itumalo o Falealupo i le palota tele o le 2021 sa iai se tagi o tuua’iga o faatosina sa faasaga i le sui na manumālō peitai na iai se maliega na taunuu iai le itu na tagi ma lē na tuua’ia ma faamavae ai ma le tofi lē na manumālō, ma lē faaauauina ai loa ona su’esu’e moliaga.
O le matāupu ua i luma nei o le faamasinoga ua faaalia e le Komesina o faigāpalota le afioga Toleafoa Tuiafelolo Alexander John Stanley e silia i le to’aselau tagata palota i le lola a Falealupo o loo tuua’ia ai.
